میرے ہمسفر

میرے دوست میرے ہمسفر تیری نذر ہیں میرے جذبۂ دل کی شدتیں
میرے خواب ، میری بصارتیں ، میری دھڑکنیں ، میری چاہتیں

جو تیرے قدم میرے گھر چلیں میرے ساتھ شمس و قمر چلیں
تیری قربتوں میں سمیٹ لوں راہ زندگی کی مسافتیں

یہ رداۓ جان تجھے سونپ دوں کہ نہ دھوپ تجھ کو کڑی لگے
کہیں دکھ نہ تجھ کو عطا کریں سر دشت غم کی تمازتیں

تیرے نام سے میری صبح ہو تیری یاد میں میری شام ہو
تیرے روبرو رہیں سرخرو میرے چشم و دل کی عبارتیں

تیرا پیار میری دعا رہے ، یہی فکر مجھ کو سدا رہے
کہ لہراتا رہے تیرا نخل جاں کہ نصیب ہوں تجھے راحتیں

میرے روز و شب کے نصاب میں میرے پاس اپنا تو کچھ نہیں
تیرا قرض ہے میری زندگی ، میری سانس تیری امانتیں